Fia wos brauch ma Werte?

Klane Vormerkung: Sunntog in da Fria kumt echt wos schenes, oba trauriges online. Better be ready with TEMPOS.

In da Maturaklass bin i förmlich geschädigt worden von diesen Erörterungen, Meinungsreden & Analysen. Vorollem a Text hat sich in mei Hirn gebrannt und zwar der über irgendwelche Tretmühlen und den verschiedenen Werten.

2015 mit meinen zoaten 18 woan mia meine eigenen Werte holt noch so unbekannt wie da blaue Anisschnops. Heit sitz i mit dem auf da Terrassn und konn meine Werte auf verschiedenen Ebenen definieren.

Wos sein Werte überhaupt? Werte sein so unsre Keywords, de uns wichtig sein. Beim Thema Freindschaft, Leben, Partner und so weiter.
Klassische Werte für a guats Leben, wo i joarelong gmant hon, des wern natürlich a meine eigenen sein: Erfolg, Gesundheit, Liebe.

Hob i gmant, wennst an guat bezohltn Job host, an Freind host und gsund bist, host e olles erreicht im Leben. Jo so klankariat hon i gedocht. Liebe woa für mi holt a anfoch a Partnerschaft. Selbstliebe, Familie und Freindschoft hätt i do nit dazuagezählt. Do woama noch im Gedonken bei „Wenn i an Kerl hob, der mi glücklich mocht, donn reicht ma des.“ Also bitte, als wär Selflove noch nit mol erfunden woan..

Irgendwonn hob i donn mei komplettes Hirnvolumen genutzt und hob mol mehr nochgedocht. Weil woatets amol, hot man nit liaba an guatn Job, der an taug? Nur weil i viel verdien, oba ohne Motivation und dafia mit Bauchweh in de Firma steig, werds ma nix guat gehn.  Und is a Partner zwingend a Glücklichkeitsfaktor? Mia kumt jo vua, de meisten in mein Olta gregen de ersten Folten lei von senra Beziehung. Partner kennen jo Stresslevel Britney Spears 2007 sein, wenn man de Beziehung holt komplett folsch ongeht.

Gesundheit is und bleibt a Wert, auf den i besteh. Sig man mol Leit, de nit es Glick hom gesegnet zu sein wie wir, versteht man des.

Der größte Reichtum ist Gesundheit. 

 

In den letzten Joan hom sich meine Werte vaschoben und geändert, donk meinem Umfeld und oll de Sochn, de ma passiat sein und mi geprägt hom.
Ehrlichkeit, Respekt, Humor, Vertrauen und Sicherheit sein meine Keywords, wenns um mei Leben geht. ✨

EHRLICHKEIT

Liaba amol kurz a Spritzn einehaun stott operieren. Liaba kurz Wunde säubern und nahn, bevua ma a leblong de Noaben mit sich trog.
Mit de Beispiele will i lei sogn: Seids ehrlich. A wenns weh tuat, probiats liab ehrlich zu sein.

I zag eich, wie des geht:
I hon kane Gefühle fia di!
Es tuat ma lad, oba du host besseres verdient. I konn da nie des geben, wos du da erwoatest.

Mama i hob an Fetzn gschrieben.
Dieses mol hots nit gereicht geliebte Mutter, oba es nächste mol bestimmt!!

I finds voll scheisse, doss du dein Freind betrügst!!
Am Ende musst du mit dir selber kloa kemen. I kenn di so guat, doss i was, doss du so wie du di grod auffiast, nit glücklich bist.

Du bist dick woan./ Du bist dünner woan.
SOG ANFOCH NIX.

Gegenteil von Ehrlichkeit is lügen. Oba nix zu sogen is ab und zu passender. Wie gsog, i hupf auf ka Herzl, wenn’s schon am Boden liegt. 

RESPEKT

I red nit von Anerkennung, de an aufgeilt. Dieses „Olta du Reissa, wieda 3729 Mädels ausn Zelt gramt. BRAV.“ So geht Respekt jetzt nit.

I finds oba voll wichtig, Menschen, de wos Außergewöhnliches (oba decht wos Positives) tuan, dafia zu loben/ anzuerkennen. 

Klassiker sein e Feierwehrla, Sanitäter, Zivi, FJler .. unsre Eltern natürlich a!! Generell jeder Mensch im sozialen Bereich hot mein gresten Respekt. Also jede Kronknschwesta, jeda Erzieher, jeder jeder holt. 

Oba genauso Mädels, de daham am Bauanhof helfen onstott vom Fuatgehn noch im Bett zu liegen. Oba genauso Jungs, de es Date obsogn, wal se auf de klanen Gschwists schaun miasn. Oba genauso umgekehrt man i des jo a! Fia mi is es zum Beispiel echt unvorstellboa, wie man in mein Olta oda jinga so am Hof mitoabeitn konn. De Leit, de de Sommerbräune nit vom See liegen hom, sundan vom Heign. Gleiches Spiel a mitn Gosthaus daham oder jeglichen Familienbetrieb.

Respekt ghert so vielen Leit. Denk ma on alanerziehende Elternteile, on Familien mit beeinträchtigten Kindern oda Menschen mit gebrochenen Herzln, de tuan als wär olls guat.

Und wie zag man Respekt? Man sog des anfoch. Sog anfoch mol „i bewunda di, weil..“ zu wem, zu dem du des schon längst hättest sogn sollen.

HUMOR

Wär hätte des gedocht, doss i liaba a Gaude hon in mein Leben, onstott Freiheit oda Ruhe. A Rua hon i wenn i olt bin, freies Vogele bin i jo e. Außerdem tuat zvü Freiheit nit guat!!

Des Leben voller Probleme, Ernsthaftigkeit und Sorgen konn so trist sein. A gewisse Portion Humor regt es Kepfl on und losst es Herzl weitapumpn.
Bin i doch so a leicht unterhaltsames Wesen, des bei OKEKS jedes Mol lochn muas. (Wollt grod schreiben obkeksn, des wa zvü gwesn)

Außerdem loch i bei jeder Folge Friends so hoat, obwohl i meistens an mei eigenes Leben erinnert werd.

VERTRAUEN/ SICHERHEIT

Zwa Werte, de nit ohne einond auskemmen. So wie de Wörter Larissa und Potsch. Oda Pizza und Knoblauch. Oda Jägamasta und Milch. Oda Netflix und Chill.

Vertrau i ana Person, fühl i mi sicher bei der.
Vertrau i mein Projekt, bin i ma sicher des wert wos.
Vertrau i ma selber, was i, doss i sicher olles hingreg.

I werd gonz unrund, wenn i nit was, ob i wen vertraun konn. Desholb ruaf i solche Kandidaten (vor ollem weiblich) oft on, um dieses Screenshottheater zu umgehen. Vertrauen braucht nit joarelonges Kennen, ewig viele Beweise und an schriftlichen Vertrag. Is des Gefühl do, is es anfoch do. Bei Sicherheit is des genauso.
Lei bin i donn nit gern in Teilzeit mit der Person verbunden. I will nit lei an Teil onvatraun kennen und beim Rest schaug i selba weiter. Es gonze Packl muss i in de Hond druckn kennen. I hon nämlich a Freindin GHOBT, de is imma do fia mi gwesn. Sobold es oba ums Thema Männer gongen is , konnst se schmeißn. Vor ollem, wenn se ihr selba getaugt hom. Weil jo olle Jungs depat sein und donn wird jeder potentielle Traumprinz zu an „der is e nix fia di“ Pfosten obgstempelt. So ane Leit brauch ma nit, Ciao Adios.

I fühl mi daham sicher. I fühl mi oba a in Strassburg um 6 in da Fria sicher. Beim Mithamfoan bei gewissen Leit fühl i mi a sicher, bei a poa weniger. Oba generell foa i lei mit Leit mit, de mindestens genauso guat Autofoan kennen wie i selba. 

In Beziehungen woa ma da Wert Treue zwoa wichtig, oba jede Eifersucht nimmt da de Chance, dronn zu holten. Heit sein meine Werte ana Beziehung eher in der Liga „Gleichberechtigung/ Weiterentwicklung/ Wille“ . I mecht ihm Aug zu Aug gegenüber stehen, egal, wer wie viel verdient oda wer jetzt grod de schlimmere Zeit durchsteht. Sollt man jo e zomm durch stehen. In Beziehungen sollt man holt den ondan nit verändern, nix spricht oba gegen verbessern. Best Version of me. So holt. Man konn jo gern dazua lernen. I will damit sogn, doss man bereit is, fia des wos man hot, zu oabeiten. Des Glück nit jetzt von 272892 Schmetterlingen obhängig zu machen, de leider a Lebensdauer von lei 6-12 Monat hom. Doss man nit noch 3 Monat drauf kumt, so obwärts wolgen wollt man nit und eigentlich hätt man den ondan mehr schätzen sollen. 

Und da neichste Wert: Briefe schreiben.  Dazua kema a ondas Mol. 

Soll i eich noch bisi Klugheit zagn? Passts auf. Hob i ausn Buach “ Liebe“ vom Precht. (Des is sooooo a gscheida Teifl.):
Da Erfinder des Wortes „evolutionäre Psychologie“ da Michael T Ghiselin behauptet komplett frech, doss es uns lei ums Haben und Gregn geht. Werte wie Reichtum, Besitz und gnuag Respekt, doss uns jeda olles gibt. Oba dabei is den Mensch doch genauso wichtig, wer zu sein und bestimmte Dinge zu tuan. Werte wie Kreativität und Freiheit und Weiterbildung. Und Humor wohl a.

Indem man was, wer man nit sein will, was man, wer man sein will. Konnst du bei gewissen Werten sogn „Na, juckt mi goanit.“ konnst schon mehr obschätzen, welche di mehr interessieren. Man wocht nit glei in da Fria auf und was auf amol, welche Werte man vertreten will. Des is wieda mol so a longfristiger Prozess, wie Selbstliebe oda so. Gib da bisi Zeit, loss di bisi inspirieren und leb anfoch dei Leben. Donn kumst e am schnellsten drauf.

I will ka Mensch mit komplett depate Werte sein.
& i glab du, egal wer des a immer liest, a nit.

Schenen Feiertag. ❤️❤️❤️

Werbeanzeigen

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden /  Ändern )

Google Foto

Du kommentierst mit Deinem Google-Konto. Abmelden /  Ändern )

Twitter-Bild

Du kommentierst mit Deinem Twitter-Konto. Abmelden /  Ändern )

Facebook-Foto

Du kommentierst mit Deinem Facebook-Konto. Abmelden /  Ändern )

Verbinde mit %s